ПРОГРАМНИ ЗАДАТКИ

ДРУЖТВА ЗА РУСКИ ЯЗИК, ЛИТЕРАТУРУ
И КУЛТУРУ

План розвою и дїялносци у новим милениюме (2006-2010)

За прешли дзешец-петнац роки активносцох Дружтва за руски язик, литературу и културу за хтори, по шицким судзаци, мож повесц же були з єдного боку начежши одкеди Дружтво основане, бо ше робело у рокох повойнових пременкох у дружтве и нашей жеми, рокох без материялних средствох, алє источашнє и у рокох з велькима активносцами и, на нашу радосц и поцешенє и зоз досц значнима резултатами и започатима акциями. Обсяжни препатрунок активносцох о роботи у прешлим чаше тото найлєпше илуструю.

Робота Дружтва ше и после трох и пол деценийох од снованя (1970) отримала, предлужени континуитет и намаганя за преширйованьом и збогацованьом змисту роботи. Прето, рушаюци од тих здобуткох, План розвою и дїялносци Дружтва, як и опредзельнох зоз члена 11. и 28. Статута Дружтва, за наступни период, односно у новим милениюме предкладаю ше тоти програмни задатки:

1. Преучованє и наукови обробок руского язика,

2. Пестованє и унапредзованє руского язика и подзвигованє язичней култури,

3. Образованє и воспитанє кадрох у обласци руского язика

4. Унапредзованє литературней дїялносци на руским язику язика,

5. Защита и пестованє културного и духовного скарбу,

6. Виглєдовацка робота у обласци руского язика и култури,

7. Порушованє и унапредзованє културней дїялносци,

8. Робота подружнїцох, секцийох и роботних целох Дружтва и членства,

9. Видавательна дїялносц Дружтва,

10. Медзинародна активносц и

11. Сотруднїцтво зоз другима орґанизациями и институциями

1. У прешлим периодзе закончени двотомни Сербско-руски словнїк (1995. и 1997), у пририхтованю єднотомни Руско-сербски словнїк, хтори би мал висц о 2-3 роки. Источашнє почала робота на нових проєктох; Словнїку руского народного язика и Правопису руского язика на хторим ше буду анґажовац виглєдовацки тими у сотруднїцтве зоз Линґвистичну секцию Дружтва. Уж вецей роки ше роби на Словнїку медицинскей терминолоґиї (сербско-латинско-руским). Треба дац увагу и анализи руского язика у институцийох хтори свою активносци витворюю по руски у цалосци або з часци.

2. За прешли 9-10 роки обновене, преширене або по першираз почало виучованє руского язика зоз елементами националне култури у значним чишлє основних школох у наших рускох местох. Тераз ше витворює у 11 населєньох и зоз порядну наставу хтора ше отримує у 3 местох, то 14 руски школи (3 основни школи зоз порядну насаву и понад 30 зоз пестованьом). Зоз тим числом школох облапени понад 500 школяре у порядней настави и коло 200 зоз пестованьом. Прияте и єдно число нових наставнїкох (8-9), ожила културна активносц по руски у местох дзе их такповесц нє було (Ґосподїнци, Кула, Нове Орахово, Суботица, Беоґрад, места у Сриме). У наступним чаше треба затримац тот уровень, а кед же ше укаже молївосц, у дзепоєдних местох треба уводзиц и други фурми настави по руски, напр. пестованє на предшколски возросту, штреднїм ступню итд. Намагац ше обезечиц школского надзорнїка (совитнїка) за руски язик, хаснованє учебнїкох за порядну наставу и пестованє, орґанизовац фахове усовершованє наставнїкох, орґанизовац стретнуца рускох школох итд.

3. Попри виучованя руского язика у основним образованю, доприношиц розвою предшколского вихованя на мацеринским язику, потим розвою рускей ґимназиї у Руским Керестуре, як и Одсеку за русинистику (Катедри за руски язик и литературу) Филозофского факултета у Новим Садзе. З тим у вязи намагац ше на обезпечованю достаточного числа дзецох, школярох и студентох же би тоти нашо институциї могли окончовац свою дїялносц и пририхтовац кадри зоз познаваньом руского язика и анґажовац их у виховно-образовней роботи, наставним процесу, педаґоґийне и науково-виглєдовацкей роботи.

4. Порушовац литературни активносци по руски, як обявйованє ориґиналней творчосци, так и преклади зоз других язикох. Окремну увагу дац дзецинскей литератури, часописом за дзеци и школярох, а тиж и за штредню школу итд. У рамикох популаризованя руского язика означовац рочнїци и значни датуми зоз обласци язика, литератури и култури, рочнїци кнїжкох, часописох и других виданьох хтори мали важну улогу и були крочай напредок у културним, просвитним и журналистичним живоце Руснацох, потим рочнїци писательох, публицистох, промоциї нових виданьох, меморияли културних творительох, потримовац и орґанизовац литературни конкурси, як напр. Ровнїно моя широка др Мафтея Виная, а означовац и рочнїци других националних заєднїцох у рамикох Координациного одбору дружтвох за язики, литературу и културу Завода за културу Войводини, Нови Сад итд.

5. И надалєй давац увагу пестованю културного и духовного скарбу. Призберовац школску, линґвистичну, етнолоґийну и другу документацию, фотоґрафиї, а практиковац и вистави же би материяли и прилоги були доступни цо векшому числу почитовательох. З тим у вязи, орґанизовац округли столи з обласци скарбу и публиковац сообщеня у окремних публикацийох, або Зборнїку Дружтва. Предлужиц едицию „Одняте од забуца”, видац публикацию „60 роки Руснацох у Новим Орахове”, а потримац и виглєдованя о праткох, мольбох и други инстанцох зазберованя Руснацох (заходни Срим) итд.

6. Зоз виглєдовацку роботу у обласци язика хтора розпочата зоз проєктом о розвиваню, унапредзованю и зачуваню руского язика дзецох и младежи у чаше од 1996-2006. року (три фази виглєдованя), реализовани значни активносци хтори би, по шицким судзаци требали буц главне опредзелєнє у роботи нашей орґанизациї и у наступним чаше, та з тим у вязи предкладац и други виглєдованя з обласци язика, як екипни и вецей рочни активносци. Зоз тим ше анимирує векше число наших и других фаховцох з тей обласци и ширше. Орґанизовац тематски науково-фахово сходи и конференциї з обласци руского язика, литератури, просвити и скарбу (у рамикох Дньох Миколи М. Кочиша, Мемориялу проф. Гаврила Г. Надя) трибини на Катедри за руски язик и литературу итд.

7. Порушованє и унапредзованє културней дїялносци у обласци рускей подобовей, музичней, театралней, рецитаторскей и других обласцох. Предлужиц активносци на планє видаваня капиталних дїлох, як напр. нове виданє руских народних шпиванкох з обласци музичней творчосци, а у обласци подобовей уметносци орґанизовац вистави (колективни, самостойни), подобово колониї (за дзеци и одроснутих), анимирац уметнїкох за участвованє на виставох, конкурсох як у рамикох наших (руских), так и ширше. Участвовац на смотрох и змаганьох у рецитованю, стретнуцох театралней, музичней творчосци и подобових сходох.

8. Дружтво тих рокох чишлї 900 (934) порядних и понад 70 почесних и помагаюцих членох и роби у рамикох 9 подружнїцох хтори основани у Руским Керестуре, Коцуре, Новим Садзе, Дюрдьове, Вербаше, Кули, Новим Орахове, Шидзе и Сримскей Митровици, 5 секцийох зоз дїялносцу у Ґосподїнцох, Бачинцох, Беоґрадзе, Кичинеру (Канада), Миклошевцох и Петровцох (Горватска) нєпостредно зоз членми у Беркасовем, Бикичу и Суботици як и у рамикох вецей фахових роботних целох, одборох, секцийох, активох, редакцийох и комисийох. Треба збогацовац змисти роботи подружнїцох, секцийох и роботних целох з новима акциями и опредзельовац ше за таки хтори прицагую цо векше число почитовательох.

9. Отримац потерашнї ступень видавательней дїялносци: видавац периодични публикациї Зборнїк роботох „Studia Ruthenica” и Часопис за културу „Ерато над Коцуром”, предлужиц зоз роботу на Руско-сербским словнїку и Словнїку руского народного язика, закончиц Словнїк медицинскей терминолоґиї, робиц на Правописним словнїку, предлужиц виходзенє едицийох з обласци образованя и воспитаня (сликовнїци за предшколски дзеци, моноґрафиї о руских школох, музичней творчосци итд), публикацийох о руским скарбу одняте од забуца (попри коцурских активносцох, облапиц и културни активносци вязани и за руски штредки, живот и роботу: 60 роки Руснацох у Новим Орахове, 200 роки Руснацох у Шидзе, Колєсарске ремесло, Наша кухарка), а порушовац и други форми видавательней дїялносци з обласци язика, линґвистики, литератури и културу.

10. Медзинародну активносц Дружтва витворйовац у рамикох скорейших обсягох. Кед ше укаже можлївосц, поволовац учашнїкох на нашо сходи, а брац учасц и на сходох у иножемстве (напр. у рамикох шветових конґресох и сходох). Обявйовац роботи науковцох и почитовательох зоз иножемства, черац фахову литературу. Комуникацию зоз фаховцами за руски язик (русинистами, славистами), отримовац и прейґ електронских медийох (интернет), як и других средствох информованя (гласнїки, часописи, билтени итд).

11. Сотруднїцтво зоз другима орґанизациями, насампредз у рамикох фахових програмних активносцох було успишне у прешлим периодзе, а треба го предлужиц и у наступним периодзе. Сотрудзовац зоз дружтвами за язики, литературу и културу (у рамикох Заводу за културу Войводини), рускима дружтвенима орґанизациями, руски грекокатолїцку церкву, видавательнима и информативнима установами, образовним и културним институциями итд. У рамикох руских орґанизацийох у иножемстве (руска дияспора) предлужиц сотруднїцтво зоз РДСА у Канади, орґанизациями Руснацох у Горватскей, Нємецкей, Словацкей, Польскей, України, Мадярскей, Ческей, Шведскей итд.

Програмни задатки Дружтва ше буду витворйовац през рочни програми роботи, oперативну програму, роботу подружнїцох, секцийох и фахових целох, oдборох, редакцийох, комисийох итд.

Free Dreamweaver Template from JustDreamweaver.com