Днї Миколи М. Кочиша

Стретнуца руских школох

Актив наставнїкох руского язика

Актив вихователькох руского язика

Пестованє язика

Пестованє язика у стреднїх школох

Проєкти

Studia Ruthenica

Змаганя

Конкурси, награди и припознаня

„Поетски нїтки Меланиї Павлович"

Подобова дїялносц: Подобова колония "Стретнуце у Боднарова"

Науково-фахови сход

 

 

 

 

 

 

 

 

 

Статутарна дїялносц

Видавательна дїялносц

Програмна дїялносц Дружтва

Проєкти, програми, акциї и манифестациї

Дружтво реализує вецей образовни, културно-уметнїцки и подобово програми, медзи хторима:

1.„Днї Миколи М. Кочиша" ше реализую у сотруднїцтве зоз Мемориялним одбором „Микола М. Кочиш" при Заводзе за културу Войводини у Новим Садзе. Од 1989. року отримани три науково-фахово сходи (1993, 1998. и 2004. року), як и 18 програми дньох М. М. Кочиша у Новим Садзе и других руских штредкох.

Алея писательох на Городским теметове у Новим Садзе:
Мирослава Антича, Миколи М. Кочиша, Ференц Фехер и Раде Обренович

2. „Стретнуца руских школох" ше отримую од 1994. року - перше стретнуце було у Бачинцох (1994), друге, треце и дзевяте у Руским Керестуре (1995, 1996. и 2003), штварте у Шидзе (1997), пияте ювилєйне у Бачкей Тополї и Новим Орахове (1998), шесте у Коцуре (2000), седме у Дюрдьове (2001), осме у Кули (2002), дзешате ювилєйне отримане у Бачинцох (2004), єденасте у Ґосподнїцох (2005), дванасте у Миклошевцох (2006), тринасте у Новим Садзе (2007), штернасте у Вербаше (2008), а петнасте ювилєйне ше планує у Новом Орахове, 2009. року.

3. У рамикох Мемориялного одбора проф. Гавриїла Г. Надя Дружтво руским просвитним роботнїком додзелює ше награду плакету зоз подобу проф. Гавриїла Г. Надя. Потерашнї добитнїки награди: Славка Сабадош (2003), Златица Сивч Здравич (2004), Мария Бесерминї (2005) и Сенка Славчев (2006) и Ксения Варґа (2007).

Силвестер Макаї: Плакета проф. Гавриїла Г. Надя

4. Литературно-подобови конкурс "Др Мафтей Винай" Равнїно моя широка ше розписує од 2004. року, а о наградох (донациї) ше стара проф. Татяна Таґасович Винай дзивка др Мафтея Виная зоз Суботици. На першим конкурсу вжали учасц школяре зоз Руского Керестура, Суботици, Старого Жеднику, Шиду, Бачинцох, Кули и Нового Саду. Резултати конкурсу обявени у Studia Ruthenici 11, 2006, б. 193-202

 

Квеце на гробе др Мафтея Виная у Суботици

 

Др Мафтей Винай

5. Як здогадованє на педаґоґийну роботу Славки Сабадошовей, найлєпшим новосадским школяром хтори пестую руски язик зоз елементами националней култури и школяром у место, у хторих ше отримую стретнуца руских школох додзелює ше припознанє зоз єй меном. Припознаня по терз достали 14 школяре: Єлена Павлович и Лариса Иванов (Ґосподїнци, 2005), Мирон Грубеня и Виктор Сакач (Нови Сад, 2005), Ана Римар и Евґений Новта (Нови Сад, 2006), Ґоран Ждиняк и Ванеса Бики (Миклошевци, 2006), Адрияна Тома и Тияна Виславски (Нови Сад, 2007), Адрияна Еделински и Мартина Миклош (Вербас, 2008) и Соня Раич и Мелита Рускаї (Нови Сад, 2008).

6. У Ґосподїнцох ше отримує подобова колония "Стретнуце у Боднарова" - за школярох од 2001 и за подобових уметнїкох од 2005. року. Отримани седем подобово колониї за дзеци и штири за уметнїкох. Роботи зоз колонийох ше викладаю у наших штредкох: Новим Садзе, Руским Керестуре, Кули, Дюрдьове, Шидзе, Жаблю, Беоґрадзе, Новим Орахове итд.

Петар Мояк: Стеван Боднаров, теракота

7. Дружтво у сотруднїцтве зоз компетентнима институциями образованя и рускима школами орґанизатор Републичного змаганя з руского язика. Отримани осем змаганя – перше (2000), друге (2001), пияте (2005) и осме (2008) у Руским Керестуре, штварте (2004) и седме (2007) у Коцуре, треце (2002), шесте (2006) у Дюрдьове, дзе ше отрима и дзевяте (2009).

8. Клуб подобових уметнїкох, хтори од 1996. року роби у рамикох Дружтва, видал 2003. року капитале дїло з обласци подобовей уметносци под назву Подобова творчосц Руснацох (лексикон), дзе заступени 122 подобово уметнїки, а орґанизовани и три колективни (заєднїцки) вистави (1997, 1998 и 2003), як и вецей самостойни авторски: Гелени Сивч, Владимира Колєсара, Гелени Канюх, Янка Чизмара, Мити Пушкарова, Силвестера Макая, Владимира Молнара, Милана Колбаса итд.

9. Подружнїци и секциї Дружтва по наших местох орґанизую литературни, подобово и други активносци: у Бачинцох (при основней школи) робя литературни секциї "Микола М. Кочиш" (по руски) и "Бошко Урошевич" (по сербски), у Новим Орахове литературна секция "Штефан Чакан", у Суботици манифестация "Яр др Мафтея Виная", у Шидзе литературна секция "Анґела Прокоп", а у планє и „Михайло Михал Ковач”, у Беркасове и Шидзе, ше пестує здогадованє на подобово уметнїци Надю Волчко и Ксению Страценски, у Бикичу означена 60-рочнїца рускей школи, у Сримскей Митровици основана секция зоз меном "Ани Ганчи Кнежевич" (2000), у Кули ше пестує творчосц др Гавриїла Костельника, чийо мено ноши и РКУД у тим городзе итд. У рамикох означованя 60-рочнїци Руснацох у Новим Орахове (1946-2006) отримани семинар о рускей басни и розписани литературно-подобови конкурс „Штефан Чакан” зоз исти тему. Резултати конкурсу обявени 17. мая 2008. року у Руским Керестуре, а прилоги зоз конкурсу ше планує обявиц у Studia Ruthenici 13, 2008. року. Припознаня „Ана Кнежевич" ше додзелює од 2007. року. Добитнїки за 2008. рок школяре основних и штреднїх школох у Сримскей Митровици: Mилена Костич, Tияна Бережни, Ивона Бережни, Дарко Ходоба, Kaтарина Бережни, Исидора Бережни, Душан Костич, Желько Ходоба, Стефан Желем Челап, Андрей Бережни и Єлена Петрень, одроснути: Весна Бобич, Вера Сакан, Mиряна Желем Челап, Mихайло Ґрабаня, Владимир Балащак и Драґана Ненадич, наставнїк руского язика, тиж и институциї и оранизациї: Народна библиотека, Дружтво Руснацох и Грекокатолїцка парохия у Сримскей Митровици.

Промоция кнїжки Руснаци у Сримскей Митровици

10. Дружтво ше стара о означованю важних рочнїцох, датумох и манифестацийох з облаци руского яика, литератури и културного нашлїдства Руснацох, а тиж и о рочнїцох других народох и националних заєднїцох зоз хторима жиєме и твориме.

 

Статутарна дїялносц Дружтва

Робота подружнїцох, секцийох и роботних целох

Спрам члена 11. Статуту Дружтва основни програмни задатки то провадзенє активносцох на планє русого язика и литератури и сучасней литературнй творчосци, водзенє обдуманей роботи на поєдних аспектох нормованя язика и його дальшим обробку и надбудови, координованю пестованя руского язика, розвиваню литературней и линґвистичней критики, даваню помоци просвитним роботнїком, лектором, прекладательом и другим прейґ секцийох и фахових целох Дружтва.

Схадзка Скупштини Дружтва, 1.12.2007. року

Дружтво ма свойо роботни цела: Скупштину, Предсидательство и вецей секциї: линґвистичну, литературну, за културни скарб, потим активи: за наставнїкох руского язика и за виховательки, як и одбор за науково-виглєдовацку роботу и фахово сходи и клуб подобових уметнїкох итд.

Схадзки Дружтва за руски зик, литературу и културу у Новим Садзе
и Руским Керестуре

Порядна настава по руски ше (у континуитету) отримує у основних школох у Руским Керестуре, Коцуре и Дюрдьове, а у рамикох сотруднїцтва зоз компетентнима институциями образован и основнима школами у Войводини пошвецена увага пестованю руского язика з елементами националней култури у штредкох дзе пре мале число школярох нєт можлївосци орґанизовац порядну наставу на мацеринским язику. Зоз тоту форму облапени вецей як 300 школяре у коло 30 основних школох (у 17 населєних Руснацох): Нови Сад, Ветерник, Петроварадин и Сримска Каменїца (18 основни школи), Вербас (4), Кула (2), Нове Орахово/Бачка Тополя (2), Ґосподїнци (1), Шид (2), зоз подручнима оддзелєнями у Бачинцох, Беркасове и Бикичу, Сримска Митровица (1/4), Суботица (1/6), Савино Село (1) и Беоґрад (1/5). Од 2006. року ше руски язик пестує и на штредньошколским ступню у Новим Садзе, а планує ше исти активносци започац и у Шидзе (2008). Руски язик ше ширше у швеце виучує у Миклошвцох и Петровцох (Горватска), а од 2007. року и у Канади.

Наймладши пестую мацерински язик у предшколскей установи у Новим Садзе, Вербаше и Кули, а порядни воспитни ґрупи предшколского возросту єст у Руским Керестуре, Коцуре и Дюрдьове. У Руским Керестуре роби ґимназия на руским и сербским язику (зоз сучасним средньошколским интернатом), а у Новим Садзе Одиль за русинистику (потерашня Катедра за руски язик и литературу) на Филозофским факултету, дзе ше од 2007. року отрумую и мастер студиї.

Видавательна дїялносц

Кед у питаню терминолоґийни словнїки хтори у чаше пошвидшаного розвою образованя руского язика були насущна потреба (снованє ґимназиї, прекладательних службох) у соструднїцтве зоз Заводом за учебнїки у Новим Садзе видати вецей словнїки з рижних обласцох, а и Дружтво видало три. Авторе тих словнїкох були др Юлиян Рамач, Гелена и Михайло Канюх и Янко Рац. У сотруднїцтве зоз Домом култури у Руским Керестуре и Музейом Войводини видати каталоґ Музейна збирка у Руским Керестуре (1976). Виглєдовацки тиму Дружтва у сотруднїцтве зоз лїкарами специялистами, на чолє зоз др Миколом Новтом, Ксению Кугайда и Наталию Рамач як и рускима линґвистами видало Сербско-латинско-руски-словнїк медицинскей терминолоґиї 2006. року, а 2008. року у сотруднїцтве зоз др Радмилу (Сакач) Шовлянски розпочата активносц на видаваню Сербско-латинско-анґлийско-руского словнїка за защиту живитного стредку и защиту рошлїнох.

У поглядзе литературней творчосци мисия руского язика у подполносци виполнєна. Ношела ю и ноши плeяда авторох - вецей як 20 познати писателє - члени Дружтва писательох Войводини хтори у тим периодзе написали вельке число литературних дїлох зоз хторима збогацена литературна творчосц, а тиж и писана дїялносц на тих просторох, та и ширше. Литературна секция Дружтва ше намага отримац континуитет сотруднїцтва зоз рускима писателями, анимирац их на стретнуца, промоциї и други литературни сходи.

 

Линґвистична секция у сотруднїцтве зоз Катедру за руски язик и литературу роби на вецейрочних проєктох, як цо то: Словнїк руского народного язика и Правопис руского язика, Сербско-латинско-руски словнїк медицинскей терминолоґиї. З нагоди 100-рочнїци Идилского венца "З мойого валала" др Гавриїла Костельника (1904-2004) вишло репринт (2004) и осучаснєне виданє (2005) тей значней кнїжки рускей уметнїцкей творчосци хтору пририхтал др Юлиян Рамач.

Вєдно зоз Катедру за руски язик, литературу и културу и Заводом за учебнїки и наставни средства Беоґрад, Оддзелєнє у Новим Садзе, обявени Сербско-руски словнїи I II том (1996-1997), Ґраматика руского язика др Юлина Рамача (2002) и тру учебнїки за пестованє руского язика др Якова Кишюгаса.

Дружтво ше стара о подзвигованю яэичней култури дзецох и младежи, и з тим у вязи сотрудзує зоз компетентнима министерствами и секретариятами. Реализує ше проєкт "Розвиванє, очуванє и унапредзованє руского язика дзецох и младежи (1997-2007).

Видавательна дїялносц Дружтва (подружнїцох и секцийох), попри Зборнїка роботох "Studia ruthenica", тиж значна. Видзелюєме за тоту нагоду три двоязични сербско-руску кнїжки: "Руска ґимназия", автора Ирини Папуґа (2000), "Колїска и ноц" Гелени Гафич Стойков (2001) и "Руснаци у Сримскей Митровици" (2004). Меланиї Маринкович видата кнїжка „Дац квету живот, Шид у мом паметаню” (2003). Литературни твор Гелени Гафич Стойков "Мацери Рускинї" (2004) и осучаснєне виданє Идилского венца "З мойого валала" вишли у соструднїцтве зоз НВУ "Руске слово" з Нового Саду, а Зборнїк писньох школярох-поетох "Квитки з нашей заградки" (2004) обявени вєдно зоз Руски матку зоз Руского Керестура. Вишли и кнїжки: др Душан Дрляча, Руснаци у етноґрафских записох (2006), Марґита Лїкар, Наша кухарка (2007), Любомир Медєши, Руска традиция (2007) итд.

У обласци предшколского вихованя, окрем двох сликовнїцох "Госц у нашим дворе" (1997) и "Мой дом" (1998) Ксениї Папуґа и Зборнїка писньох и рецитацийох Наталиї Голуб (2000), видати после 30 рокох и Зборнїк текстох за предшколски дзеци "Ластовички" 2 (2005), зоз надпомнуцом же перши приручнїк за виховательки "Лaстовички" вишол ище 1976. року.

Дружтво и Подружнїца з Коцура видаваю часопис за културу (билтен) „Ерато над Коцуром" (од 1996. по 2005. рок вишли осем числа), а обявени и Зборнїк коцурских поетох „Дуга над валалом" (1995), „Одняте од забуца" - фотоґрафиї (1995), „Драмски живот Коцура" (1998) як и Моноґрафия „Коцур дараз и нєшка" (2001).


 

Free Dreamweaver Template from JustDreamweaver.com