ПРОГРАМА
ДРУЖТВА ЗА РУСКИ ЯЗИК,
ЛИТЕРАТУРУ И КУЛТУРУ
за 2009. рок

 

за 2012. рок

 

за 2013. рок

 

за 2014. рок

 

за 2015. рок

 

 

Програма по 2010.

Календар рочнїцох 2015. рок

ПРОГРАМА
ДРУЖТВА ЗА РУСКИ ЯЗИК,
ЛИТЕРАТУРУ И КУЛТУРУ
за 2015. рок

                Рушаюци од програмних задаткох Дружтва за руски язик, литературу и културу и Плану розвою и дїялносци Дружтва за руски язик, литературу и културу (2011-2020), Управни одбор предложел шлїдуюцу програму Дружтва за 2015. рок:
1. Преучованє и наукови обробок руского язика: у 2010. року закончени Руско-сербски словнїк як вецейрочнa екипнa роботa руских линґвистох. Источашнє ше будзе робиц на проєктох хтори започати 2002. року: Словнїк руского народного язика и Правопис руского язика (Правописни словнїк), на хторих анґажовани виглєдовацки екипи у сотруднїцтве зоз Одсеком за русинистику Филозофского факултета у Новим Садзе и Одбором за линґвистику Дружтва. Тиж ше предлужи з активносцу применьованя I и II тому Сербско-руского словнїка (перши том обявени 1995. а други 1997. року), Ґраматики руского язика др Юлияна Рамача (2002) и Руско-сербского словнїка у шицких сферох образовного, културного, информативного, прекладательного живота Руснацох. Видати и два терминолоґийни словнїки: Словнїк медицинскей терминолоґиї сербско-руско-анґлийски и Словнїк защити рошлїнох и животногo стредку сербско-руско-латинско-анґлийски. З тим у вязи, по потреби орґанизовац инструктивни схадзки и розгварки у школох, медийох: редакцийох радия, ТВ итд.
2. Пестованє и унапредзованє руского язика и литератури и язичней култури дзецох и школярох: треба ше намагац отримац досцигнути уровень облапеносци дзецох и школярох зоз воспитаньом и образованьом на руским язику (на предшколским и основношколским возросту) у Руским Керестуре, Коцуре и Дюрдьове, як и пестовац руски язик як виборни предмет з елементами националней култутри у Новим Садзе, Вербаше, Кули, Новим Орахове/Бачкей Тополї, Суботици, Ґосподїнцох, Савиним Селу, Шидзе, Бачинцох, Беркасове, Бикичу и Сримскей Митровици. Далєй потримовац роботу Ґимназиї и других напрямох штреднєй школи на руским язику у Руским Керестуре, а порушовац и орґанизованє пестованя руского язика як факултативного предмета на штреднїм ступню у Новим Садзе, Шидзе, а тиж и у обласци предшколского вихованя у Новим Садзе и других заинтересованих штредкох. У складзе зоз инициятиву 12. стретнуца руских школох у Миклошевцох (2006), потримовац  виучованє руского язика у руских штредкох у Горватскей, а у сотруднїцтве зоз членми Дружтва и у Канади (Киченер и Нотрбатлефорд). Закладац ше за образованє цо векшого числа професорох руского язика на Катедри за руски язик и литературу - Одсеку за русинистику Филозофского факултета у Новим Садзе, як и наставнїкох-професорох класней настави на учительских факултетох, вихователькох на Висшей школи у Новим Садзе итд. Додзельовац награди наставнїком руского язиказоз меном и подобу проф. Гавриїла Г. Надя (додзелєни 8), як и Славки Сабадош, Меланиї Павлович и Ани Кнежевич школяром хтори виучую и пестую руски язик.    
Треба провадзиц пременки у обласци образованя и воспитаня хтори ше реализию у рамикох Министерства просвити и технолоґийного розвою Републики Сербиї и Покраїнского секретарияту за образованє, управу и национални заєднїци, сотрудзовац зоз Педаґоґийним заводом Войводини и Одбором за образованє Националного совиту рускей националней меншини, а у рамикох активох наставнїкох и вихователькох руского язика провадзиц активносци у обласци воспитаня и образованя: приношенє и реализация наставних планох и програмох воспитно-образовней роботи, видаванє учебнїкох и приручнїкох на руским язику, наставу виронауки, образованє и фахове усовершованє наставнїкох и вихователькох, анґажованє школского инспектора-надзорнїка за руски язик, финансованє у тей обласци итд. Будзе ше сотрудзовац зоз Покраїнским секретариятом за културу и явне информованє и Покраїнским секретариятом за науку и технолоґийни розвой Влади АП Войводини, Координацийним одбором дружтвох за язики, литературу и културу, Оддзелєньом за нєвладово орґанизациї Заводу за културу Войводини, Заводом за културу войводянских Руснацох итд.  У сотруднїцтве зоз инстутуциями просвити, образованя и за права националних заєднїцох, планує ше орґанизованє Двацецпершого стретнуца руских основних и штреднїх школох у хторих ше наставу отримує на руским язику и школох у хторих ше руски язик виучує як виборни, односно факултативни  предмет у Миклошевцох (Република Горватска).
Уключиц ше до активносцох хтори вязани за медзиокружне и републичне змаганє з руского язика и язичней култури за школярох основних школох (спрам пропозицийох компетентних институцийох образованя) и у сотруднїцтве з Активом наставнїкох руского язика Дружтва. Перше (2000), друге (2001), пияте (2005), осме (2008), єденасте републичне змаганє и друге медзиокружне (2011), як и пияте медзиокружене и штернасте републичне отримане (2014) у Основней и штреднєй школи зоз домом школярох „Петро Кузмяк" у Руским Керестуре (2002. року змаганя нє було), треце (2003), шесте (2006), дзевяте (2009)) и тринасте републичне (2013) и перше медзиокружне отримане у Основней школи „Братство єдинство" у Коцурe) и штварте (2004), седме (2007), дзешате ювилейне (2010) друге медзиокружне и дванасте републичне (2012) було у Основней школи „Йован Йованович Змай" у Дюрдьове, дзе ше 2015. року планує и шесте медзиокружене и петнасте републичне.                                      
3. Збогацованє литературней дїялносци и творчосци на руским язику: треба потримовац литературну дїялносц на мацеринским язику за дзеци и школярох, а тиж и преклади зоз сербского язика и язикох других националносцох. Окремну увагу треба пошвециц активносци литературних секцийох у наших местох ( Микола М. Кочиш у Бачинцох, Анґела Прокоп у Шидзе, Штефан Чакан у Новим Орахове, Ана Кнежевич у Сримскей Митровици), сотрудзовац зоз часописом за дзеци Заградка, участвовац на манифестацийох: на Костельниковей єшенї, Мемориялу Петра Ризнича Дядї у Руским Керестуре, Яри Мафтея Виная у Суботици, Дньох Миколи М. Кочиша у Новим Садзе, Дюрдьове, Мемориялу проф. Гавриїла Г. Надя, унапредзовац литературни конкурси др Мафтея Виная и Штефана Чакана. У Новим Садзе 2007. року основана литературна манифестация Поетични нїтки Меланиї Павлович, у Бикичу Литературна секция Михала Ковача (2011), уДюрдьовепрекладательна секция „Амалия Хромиш” (2012) и на таки способ указана увага визначним литературним и културним творительом. Означовац рочнїци у обласци образованя, култури и видавательней дїялносци, рочнїци литературних, театралних и подобових творительох, рочнїци руских воспитно-образовних институцийох итд.

Руски места, школи, руска ґимназия, предшколске вихованє
270 роки од приселєня Руснацох дo тих крайох (1745)
250 роки рускей школи у Коцуре (11.04.1765)
110 роки предшколского вихованя у Коцуре (1905)
70 роки роки рускей ґимназиї (першей) у Руским Керестуре (25.02.1945)
45 роки терашнєй (другей) ґимназиї у Руским Керессрзре (07.09.1970-2015)

Руски предняци, писателє, учителє, скулпторе, композиторе
160 роки o. Йoвана Храниловича (1855-1924), священїка, публицисти, писателя (Нови Сад)
140 роки Eмилияна Ґубаша (1875-1919), учителя, руского предняка (Коцур)
110 роки Стевана Боднарова (1905-1993), скулптора, маляра (Ґoсподїнци)
90 роки Oскара Кочиша (1925-1983), поети, посателя (Коцур)
90 роки Владимира Рогаля (1925-1984), учителя, руского предняка (Шид, Сот)
90 роки Дюри Варґи (1925-2003), публицисти, руского предянка (Нови Сад, Дюрдьов)
80 роки Якима Сивча (1935-1989), наставнїка музики, композитора (Руски Керестур)
80 роки Леони Лабош (Урошевич) Гайдук (1935), педаґоґа (Шид, Бачинци, Нови Сад)
70 роки Серафини Макаї (1945), наставнїци, писательки (Koцур)

Руска матка, Руске слово”, учебнїки, словнїки,  гласнїки, часописи, TВ ...
70 роки Рускей матки (першей) (1945) и 25 роки (другей, 1990) у Руским Керестзре
70 роки „Руского слова” (РНПД) у Руским Керестуре (1945)
50 роки Заводу за видаванє учебнїкох у Новим Садзе (1965)
45 роки Дружтва за руски язик, литературу и културу (04.12.1970-2015)
40 роки Рускей редакциї телевизиї Нови Сад (1975)
40 роки Гласнїка „Tворчосц” Дружтва за руски язик, литературу и културу
(1975), oд 1988. року воходзи як „Studia Ruthenica”
20 роки Литературно-подобовей колониї „Eрато над Коцуром” у Коцуре (1995).
од 1996. року виходзи Часопис зоз исту назву
20 роки Сербско-руского словнїка І том (1995) – ІІ том обявени 1997.року

Орґанизовац промоциї нових кнїжкох, учебнїкох, часописох, зборнїкох и публикацийох. Означовац  рочнїци зоз календара сербского народу и националних меншинох у Войводини. Сотрудзовац зоз Координацийним одбором дружтвох за язики, литературу и културу хтори роби у рамикох Оддзелєня за нєвладово орґанизациї Заводу за културу Войводини у Новим Садзе чий Дружтво длугорочни член на видаваню Мултиязичного билтену МОСТ. 
4. Пестованє културного и духовного скарбу и подобовей уметносци: пошвециц увагу призберованю и чуваню педаґоґийней (школскей), литературней и линґвистичней документациї и орґанизовац пригодни вистави. У рамикох пестованя културного скарбу предложиц проєкт о надгробних памятнїкох, потримовац роботу Клубу подобових уметнїкох и його програми, орґанизовац заєднїцки подобово вистави зоз каталоґом, а порушовац и орґанизованє самостойних виставох, як руских уметнїкох, так и уметнїкох зоз хторима робя и творя у своїх штредкох.
Орґанизовац тринасту школску и дзешату подобову колонию Стретнуце у Боднарова у Ґосподїнцох з участвованьом школярох з наших штредкох, афирмованих подобових уметнїкох, як и тих цо праве пробую твориц у тих обласцох. Иницировац и активносци на пестованю подобовей творчосци Надї Волчко, таписеристки по походзеню зоз Беркасова (у Шидзе), етнолоґийней збирки у Бикичу, етно хижи - скорейшей Рускей просвити у Бачинцох, Етно-клубу у Коцуре и других руских штредкох.    
5. Виглєдовацка робота у обласци руского язика: Дружтво будзе и далєй робиц на проєкту под назву „Розвиванє, очуванє и унапредзованє руского язика дзецох и младежи" (1996-2016) чию задумку и предкладанє дала др Мелания Микеш (1924-2007). У 2015. року активносци треба предлужиц и унапрямиц на розвиванє и унапредзованє руского язика у предшколским, основним и штреднїм образованю под назву „Шицки руски дзеци до руских дзецинских заградкох и руских школох!”, а тиж и у рамикох висшого и високого образованя, за виховательки у руских предшколских установох, наставнїкох-професорох у основних и штреднїх школох (висши школи, факултети, мастер студиї).
Источашнє, у 2015. року спомнути виглєдовацки проєкт у обласци руского язика прешириц и у рамикох V фази предлужиц зоз виглєдованьом хторе вязане за руску дияспору (Канада, Австралия, Нємецка). У сотруднїцтве зоз др Александром Д. Дуличенком пририхтац (конциповац) виглєдованє хторе вязане за функциї руского язика у Войводини (12 функциї: образованє, наука, култура, литература, прекладательство, информованє, видавательство, церква, театер итд.).
6. Видавательна дїялносц Дружтва: Предлужи ше з видаваньом: Зборнїка роботох „StudiaRuthenica”: видац 20 (33) число у хторим буду обявени прилоги зоз науково-фахового сходох 2014. року, а обявя ше и написи о рочнїцох, нових виданьох Дружтва итд. По законченю Словнїка сербско-руско-латинско-анґлийского о защити рошлїнох и животного стредку плановац терминолоґийни словнїк зоз даєдней другей обласци. На планє видаваня публикацийох зедициї Одняте од забуца у пририхтованю и прилоги з обласци музичней творчосци, а потримац и виданя хтори предложа фахово цела Дружтва: секциї итд.
7. Робота секцийох, фахових целох и редакцийох: намагац ше отримац уровень приятих членох (12059  - порядни 1011, почесни 110 и помагаюци 84) у секцийох, а примац и нових у местох дзе робя 14 секциї: Нови Сад, Руски Керестур, Коцур, Дюрдьов, Кула, Вербас, Нове Орахово/Бачка Тополя, Сримска Митровица, Беоґрад, Ґосподїнци, Шид, Бачинци, Бикич,Беркасов, Киченер (Канада), Миклошевци, Петровци, Вуковар (Горватска) и других штредкох: Суботица, Савине Село, Зомбор итд. Потримовац роботу одборох за линґвистику, литературу, за културни и духовни скарб, за науково виглєдованя, як и редакциї зборнїкох, часописох и других виданьох, обезпечуюци материялни средства за  їх обявйованє и друкованє. 
8. Медзинародну активносц треба реализовац у рамикох интересованя фаховцох за руски язик и литературу, а по можлївосци посилац и наших фаховцох на сходи и схадзки до иножемства. Черац часописи и публикациї, обявйовац фахови и наукови сообщеня зоз темами хтори ше одноша на руски язик, литературу и културу (у дияспори), орґанизовац нащиви до образовних, наукових и културних институцийох (музеї, ґалериї, библиотеки) итд. Сотрудзовац зоз подобнима орґанизациями и поєдинцами (почитователями руского язика и литератури) у рамикох рускей дияспори у Канади, Австралиї, на Новим Зеланду итд.
9. Сотруднїцтво з орґанизациями и институциями: Сотрудзовац зоз дружтвами за язики, литературу и културу Координацийного одбору Заводу за културу Войводини, одборами Националного совиту рускей националней меншини за образованє и културу и другима здруженями, орґанизациями, заєднїцами (асоцияциями), матками, школами, библиотеками, ґалериями, министерствами, покраїнскима секретариятами за образованє, науку, културу и за права националних меншинох, општинскима управами за дружтвени дїялносци, културнима центрами, факултетами Универзитета у Новим Садзе, церковнима општинами у местох дзе жию Руснаци, средствами информованя, а прейґ електронских медийох витвориц контакти и зоз Руснацами у швеце (Руснаци у Панониї, РДСА у Канади, Руснаци на интернету).   
10. Робота Скупштини, Управного одбору и роботних целох Дружтва: статутарну дїялносц Дружтва реализовац у рамикох предвидзених материялних можлївосцох и з тим у вязи плановац отримованє 2-3 схадзкох Управного пдбору, рочну схадзку Скупштини, як и вецей схадзки роботних целох. Исти активносци предвидзиц и у секцийох по местох. Отримац стаємну комуникацию зоз членством у нас и у швеце. Основани http://www.druztvo.com сайт на интернету (2008) дополньовац и преширйовац пре информованє о програмних активносцох Дружтва и у 2015. року.

Нови Сад, 22. 11. 2014.
Управни одбор Дружтва за руски язик, литературу и културу


СЕКЦИЙОМ ДРУЖТВА ЗА РУСКИ ЯЗИК, ЛИТЕРАТУРУ И КУЛТУРУ

У рамикох планованя активносцох Дружтва за руски язик, литературу и културу у 2015. року у прилогу посиламе шлїдуюци материяли:

1.  Програмa Дружтва зоз финансийним планом за 2015. рок    
2.  Податки о роботи и розвою Дружтва (по сербски)
3.  Календар рочнїцоху 2015. року
4.  Календар мешачних активносцох у 2015. року
5.  Препатрунок активносвцох у 2014. року
6.  Препатрунок видавательней дїялносци Дружтва
7.  Членски картон Дружтва по руски и двоязично

Модлїме же бисце приложени материяли хасновали при планованю активносцох у 2015. року, а тиж и информовали о отримованю схадзкох секциї хтори плануєце у наступним чаше и о програми роботи у вашим месце (штредку).
Надпоминаме же Статут Дружтва зоз списком роботних целох обявени у Хронїки Дружтва Studia Ruthenicа 15 (28), 2010, 171-197, План розвою и дїялносци (2011-2020) у Studia Ruthenici 16 (29), 2011, 145-148.

З почитованьом

Секретар Дружтва Ирина Папуґа  
Предсидатель Скупштини др Юлиян Рамач, в. р.

Предсидатель Управного одбору Владимир Салонски, в. р.

Послате по птт секцийом у наших местох:

  1. Владимир Дудаш, Руски Керестур
  2. Tатяна Мученски, Коцур
  3. Мария Самарджич, Дюрдьов
  4. Мср. Сенка Бенчик, Нове Орахово/Б. Тополя
  5. Владимир Салонски, Ґосподїнци
  6. Славица Мали, Вербас
  7. Мелания Арваї, Кула
  8. Татяна Таґасович и Наташа Ґрунчич, Суботица
  9. Олґица Лендєр Радович, Беоґрад
  10. Моника Абодї Митрович/Владимир Н. Манько, Сримска Митровица
  11. Владимир Ґовля, Шид/Беркасов
  12. Светлана Жанплонг/Златица Сивч Здравич, Бачинци
  13. Зденко Лазор, Бикич Дол
  14. Гелена Гафич Стойков, Нови Сад

До иножемства по интернету:

  1. Дюра Лїкар, Миклошевци, Горватска
  2. Наталия Гнатко, Петровци, Горватска
  3. Гавриїл Колєсар, Киченер, Канада
  4. Любомир Медєши, Саскачеван, Канада
  5. Желимир Пап, Австралия

Датум: 10. 02. 2015. року

 

Free Dreamweaver Template from JustDreamweaver.com